Обидот на Valve да одземе од колачот на Playstation 4 и XboX One со гејмерски PC уред за дневната соба, конечно почнува да се остварува. За време на гејмерската конференција GDC, претставени беа неколку модели на Steam уреди, кои се наменети за употреба во дневната соба, односно имаат мала надворешна големина. Да потсетиме, оперативниот систем е целосно развиен од Valve, на Linux платформа.
Подолу, ќе ви ги претставиме сите уреди, со спецификациите кои ги носат. Меѓу уредите има достапни, кои чинат 450 долари, но и компјутери од највисоката класа, кои чинат преку 5000 долари!
iBuyPower SBX
Најевтиниот Steam компјутер чини 460 долари и може да се постави вертикално и хоризонтално, што ги зголемува можностите за сместување. Убав детаљ е и LED светлото, кое може да свети во целосен RGB спектар, а по избор на сопственикот. iBuyPower SBX е опремен со AMD Athlon X4 840 процесор, AMD Radeon R7 250X графичка картичка со 1 GB рам, 4 GB рам меморија и хард диск од 500 GB.
Alienware Steam Machine
Познатиот производител на гејмерски компјутери и компоненти нуди Steam машина во неколку различни конфигурации, по цена од 480 долари па нагоре. Основниот модел доаѓа со Intel Core i3 процесор, тјунирана GeForce 860M графичка карта, 4 GB рам меморија и хард диск од 500 GB. Во серија нормално доаѓа и карактеристичниот Alienware дизајн.
CyberPowerPC’s Syber Steam Machines
CyberPowerPC е најактивен производител во оваа сфера и лансираше дури 6 различни модели на Steam машини. Основниот модел чини 500 долари и доаѓа со AMD Athlon X4 850 процесор, AMD Radeon R9 270 графичка карта со 2 GB рам, 500 GB хард диск и 4 GB рам меморија. Најсилната изведба пак чини 1400 долари и доаѓа со Intel Core i7-4790K процесор, GeForce GTX 980 графичка карта, 1 терабајт хард диск и 8 GB рам меморија.
Gigabyte Brix Pro
За разлика од другите уреди, овој е повеќе „Направи сам“ и во него вклучува само процесор и тоа Intel Core i7-4770R со Iris графиката на Intel. Системот може да се надгради со графичка карта и 2.5 инчен HDD или SSD, а има и два слота за рам. Уредот чини 600 долари и дури и не доаѓа со оперативен систем, што значи дека корисникот може да инсталира Steam OS, но и Windows на пример.
Asus ROG GR8S
Минијатурниот и футуристички уред на Asus чини 700 долари, но за него се уште нема целосни спецификации. Од она што знаеме, ќе се вградуваат Core i5/i7 процесори, GeForce графички од GTX 900 серијата, а вграден е и 5.1 аудио систем и излез за 4K видео.
Digital Storm Eclipse
Овој уред чини 700 долари и за разлика од конкурентите, кои имаат „лаптоп“ процесори, доаѓа со десктоп процесор и тоа Intel G3220, како и десктоп Nvidia GTX 960 графичка. Хард дискот има простор од 1 терабајт, додека рам меморијата брои 8 GB. Системот може многу лесно да се надградува во иднина.
NextBox Steam Machines
NetBox претстави три различни машини, кои почнуваат од 800 долари за Core i3-4160 процесор и GTX 750 графичка, до 1400 долари за моделот со Core i5-4460, GTX 970 графичка и SSD диск од 512 GB. Сите модели се опремени со 8 GB рам меморија.
Maingear Drift
И овој уред може многу лесно да се надгради во иднина, а почнува од 850 долари. Процесорите се на Intel и најсилниот во понудата е Core i7-4690K, додека графичката е R9 290X. Уредот може да се конфигурира и со 16 GB рам меморија, SSD дискови до 1 терабајт и хард дискови до 6 терабајти.
Material.net Steam Machine
Само еден модел е достапен во понудата и тоа со Core i5-4440 процесор и тјунирана GTX 960 графичка карта. Чини 900 долари, а компјутерот е вграден во одлично Fractal Design куќиште.
Origin Omega
Стигнавме до високата класа – во овој компјутер ќе може да се вградат до три GeForce GTX 980 графички карти, до 32 GB рам меморија и можност за 14 терабајти простор за складирање податоци. Најсилниот процесор во понудата е Core i7-4770K. Цените се движат од 900 до 5000 долари, а ќе биде достапна и верзија со вграден Steam OS и Windows.
Webhallen S15-01
Малиот компјутер на Webhallen има матична плоча со H97 чипсет, Core i5-4460 процесор, 8 GB рам меморија, 1 TB хард диск во комбинација со SSD и GeForce GTX 960 графичка карта. Со ваква конфигурација, чини 950 долари.
Scan 3XS ST Steam Machines
Производителот кој ги прави компјутерите што ги користи Британското Кралство нуди три системи, со цена од 1000 до 1300 долари. Најсилниот доаѓа со Core i5 процесор и GTX 970 графичка карта. Сите модели имаат SSD диск со големина од 128 GB и 8 GB рам меморија.
Zotac Steam Machine
Познатиот производител на гејмерски компоненти лансираше ултра мал компјутер, кој чини 1000 долари, но има многу солидни перформанси. Кога ќе биде лансиран, се планира вградување на Intel чип од 6-тата, Skylake генерација, заедно со GTX 970M графичк, 1 TB хард диск и 8 GB рам меморија. Zotac има и два влезови за LAN конекција и четири HDMI излези.
Alternate Steam Machine
Системот кој го користи истото куќиште како на Digital Storm доаѓа во четири различни верзии, со цена од 1100 долари па нагоре. Најмоќниот уред доаѓа со Core i5-4670К процесор, GTX 980 графичка и 2 TB хибриден хард диск.
Falcon Northwest Tiki
Единствената Steam машина која доаѓа со најновата и најмоќна графичка на NVidia, GeForce Titan X, како и моќен Core i7-4790K процесор, чини од 2000 до 5000 евра, зависно од опциите. Системот има целосно водено ладење и е наменет за сериозните гејмери.
Сите овие Steam OS уреди ќе почнат да се продаваат во Ноември, кога ќе биде лансирана и финалната верзија на оперативниот систем. До тогаш, се очекува и дивелоперите да почнат да развиваат игри кои се базирани на Linux платформата.
Извор: PCWorld
