За разлика од повеќето други познати мрежи и сервиси, Instagram е друштвена мрежа која започна директно преку претставување на мобилна апликација. За оваа мрежа веб пристапот, односно пристапот преку интернет прелистувач, е во втор план, па иако е достапен, голем дел од можностите на апликацијата не се достапни.

Според извор на TechCrunch порталот, Instagram е во фаза на тестирање на можноста корисниците да испраќаат директни пораки и преку веб пристапот до друштвента мрежа.

Тестирањето моментално се прави само внатре во компанијата, што значи дека уште не е стигнато ни до фазата на тестирање кај мал број на корисници.

Ова значи дека не е познато дали оваа функција некогаш ќе стане достапна за корисниците, кои верувам дека сепак се во главно навикнати да го користат Instagram и сите поврзани сервиси, преку мобилните телефони.

Сепак, кога ќе се земе во предвид планот на Facebook да ги поврзе нивните три сервиси за пораки, односно Messenger, WhatsApp и Instagram, можеби овозможувањето на подобра достапност до Instagram Direct е нешто што е потребно да се направи.