Facebook не сака да заостанува зад својата конкуренција во ниеден сегмент кој може да биде инкорпориран во социјалната мрежа, па таков е случајот и со мобилното плаќање. Наводно преку апликацијата за комуницирање Messenger, луѓето ќе можат меѓусебе да си праќаат пари.
Според сите протечени фотографии оваа опција Facebook веќе ја има имплементирано во својот систем, а единстевно ќе треба да се чека датум на објава. Начинот на испраќање делува премногу лесно, односно корисниците ќе можат да пратат пари исто како што сега праќаат фотографии.
Корисниците ќе можат да додадат дебитна картичка или уште поедноставно да ја користат картичката што веќе ја имаат вметнато за да извршат наплати за други работи на Facebook. Интересно е што David Marcus, новиот водач на проектот Messenger, има доста големо искуство со онлајн трансакции и доаѓа од PayPal каде што беше и негов претседател.
Со овој чекор од компанијата сакаат парче од колачот во кој веќе имаат удел покрај Paypal и компании како Venmo, Square Cash и уште неколку сервиси за трансфер на пари. За прв пат кодот за наплата/исплата во Messenger е откриен пред еден месец од страна на Jonathan Zdziarski, за потоа и Andrew Aude да презентира свој видео запис од оваа нова опција.
Во видеото на Aude, исплаќањата можат да се извршат единствено преку дебитна картичка, а ова најверојатно е поради фактот што трансферот на пари е поевтин за процесирање. Според него секоја трансакција би го чинела Facebook околу 0.40 до 0.50 долари, а доколку ја пуштат најпрво како бесплатна опција Aude очекува компанијата да наплаќа 1 долар за секоја трансакција, но сепак тоа останува да видиме дали ќе биде така.
Она што ултимативно ќе биде од корист за Facebook е секако навиката на луѓето да трошат пари на социјалната мрежа, а нивното ново копче во најава Buy ќе ги одврати корисниците од веб-страниците на онлајн продавниците и ќе им овозможи на луѓето да купуваат директно од Facebook.
Извор: The Verge