Двојните камери кои стануваат се почести кај смартфоните, а Samsung претстави и смартфон со 4 камери на задната страна од уредот, овозможуваат одредени ефекти кои не беа можни со една камера, односно една леќа.
Овие камери имаат различни леќи, односно едната може да е стандардна, додека втората широко аголна, со што се добива можност за зачувување на две посебни слики со делумно различен опфат на објектот што се слика, како и неговата позадина.
Facebook со помош на вештачката интелигенција, може да ги искористи сликите направени со двојна камера и да го објави во 3D форма. Тоа значи дека при мрдање на телефонот, односно на курсорот со глувчето на десктоп, сликата ќе почне да се прикажува од различни агли, а со тоа ќе се менува и позадината која е прикажана.
Од компанијата го споредуваат ова со гледањето низ прозор и менувањето на аголот на гледање. Не секој дел од позадината е „вистинскиот“, па вештачката интелигенција успева да „претпостави“ што е тоа што е во тој дел од сликата, врз основа на информациите кои ги има од двојната камера.
Оваа можност ќе им биде достапна на сите корисници во периодот што следи. За објава на 3D слика се што треба да се направи е да се започне нова објава, па да се избере новата можност 3D Photo која е достапна заедно со досегашните Photo/Video, GIF, Check In, Live Video и други.
