Поддршката на Microsoft Edge за екстензии, односно додатоци кои ја прошируваат функционалноста на прелистувачот, се најавува веќе одамна. Доцнењето е една од причините зошто овој нов прелистувач ја дели истата судбина со Internet Explorer, односно корисниците едноставно не го користат, барем не во доволно голема бројка.
Изминатиот период излегоа информации дека поддршката конечно ќе биде претставена и корисниците на Windows Insider верзиите од Windows 10 ќе можат конечно да ја тестираат. Според информации кои доаѓаат од извори на WinBeta и Thurrot.com, екстензиите се спремни за пуштање во наредната Insider верзија, па доколку не се јави нешто непланирано, би требало да ги видиме веќе овој месец.
Во меѓувреме излегоа слики од Windows Blog Italia кои тврдат дека се од екстензија за Edge поставена на Microsoft Store страната. Екстензијата е наречена Page Analyzer, но линк не е достапен за да може да се потврди, па останува да „веруваме“ на овие информации.
Од сликата може да се извадат одредени заклучоци за тоа како ќе функционираат екстензиите, односно како ќе се пронаоѓаат и како ќе се инсталираат.
Тие треба да бидат достапни како и било која друга Windows 10 апликација преку продавницата за апликации. По инсталирањето икона ќе биде додадена на Старт менито, по што најверојатно ќе се стартува одредена функција директно во Edge.
Екстензиите исто така ќе можат да додадат копче на горната лента од Edge, што е очекувано, а и неопходно за одредени екстензии.
Дали претставувањето на поддршката за екстензии во Microsoft Edge ќе биде доволна причина за корисниците да му дадат, веќе може да се каже, втора шанса на овој прелистувач, со што би се забавил падот на пазарниот удел. Ова е нешто што ќе биде интересно да се следи во наредните година дена.
Извор: Ghacks