Корисниците на Android отсега ќе имаат можност да ја пробаат најновата верзија на Microsoft Office, која веќе ја видовме како Preview верзија на Windows 10 оперативниот систем.
Интересно, досега корисниците на Android и iOS беа први кои ги добиваа најновите верзии од најпопуларната алатка за канцелариско работење, додека Windows Phone заостануваше назад. Новата Preview верзија е достапна за Windows 10 Mobile од пред неколку недели, а отсега ќе може да се проба и на Android уредите. Да нагласиме само, дека ова не е финална верзија и се работи за апликација која е пред се наменета за тестирање и пробување.
Дизајнот на верзијата за Android ќе биде апсолутно ист како на верзијата за Windows 10 Mobile и iOS, што е одлична вест. Исто така, ќе биде многу блиска и со верзијата за десктоп, односно лаптоп компјутерите, што значи дека сите кои работите на Microsoft Office на вашиот PC, лесно ќе се снајдете и на вашиот таблет, односно паметен телефон.
Покрај тоа, мобилните верзии на Office се сега збогатени со многу функции, кои досега беа недостапни, како на пример можноста за ставање посебни табели и графикони во Microsoft Excel. Исто така, Android верзијата ќе има уникатна можност за автоматско зачувување на датотеките на One Drive, Google Drive, Box и Dropbox, односно нема да биде ограничена од “Cloud” сервисите на Microsoft, туку ќе ги поддржува сите.
Сите заинтересирани за инсталација на Word, Excel и PowerPoint за Android, можат да се пријават на “Office for Android Community” како бета тестери и потоа ќе треба да почекаат неколку часа додека апликацијата не им биде достапна во Play Store за симнување.
Извор: Digital Trends, Engadget