Одамна немаме пишувано за одличниот Mozilla Thunderbird којшто долго време порано беше нашиот главен имејл десктоп клиент, пред да се префрлиме целосно на Microsoft Outlook. Причината за тоа е што развојот на Thunderbird не продолжи во темпото кое беше порано, а едно време се размислуваше дури и за неговото откажување.
Сепак, одлично е што Mozilla не се реши за тој потег, а оваа недела ја пуштија и верзија 60 од Thunderbird која што го прави повеќе во линија со другиот и повеќе познат проект од организацијата, Firefox.
Прво што може да се забележи во новата верзија од Thunderbird е имплементацијата на новиот Photon дизајн којшто е дел од Firefox почнувајќи од 57-та верзија, односно од ноември минатата година. Овој нов дизајн покрај генералното освежување на целиот кориснички интерфејс, најмногу очигледно донесува квадратни табови, односно тие веќе не се заоблени на краевите, а тука е и можноста да се исклучи делот со насловот на прозорот, со што се добива повеќе простор за апликацијата.
Mozilla Thunderbird 60 исто така добива ново лого кое е направено да биде во правец на новиот дизајн, односно во правецот во којшто е направено логото на Firefox.
Покрај визуелните промени, Thunderbird 60 доаѓа и со нови и подобрени функционалности, како што се на пример:
- Подобрување во работата со прикачени датотеки на кои сега може да им се менува редоследот, подобра поставеност на „Attach“ копчето и повеќе
- Подобрување во работата со настани во календарот како што е можноста за копирање, сечење и бришење на настаните, можност за гледање на локациите и повеќе
- Копче за бришење на примач на пораката
- Светла и темна тема
Целосната листа на промени која не е мала можете да ја видите на официјална страна преку следниот линк од каде можете и да ја симнете најновата верзија од Thunderbird, а истата не може само да се ажурира од постара.