Уредите за виртуелна реалност можеби уште не се стандардни кај корисниците, тие се’ уште се развиваат, па и не се толку евтини. Сепак, иднината без овие уреди не може да се замисли, а тие со текот на времето ќе стануваат се подобри и попривлечни за користење.
Mozilla веќе најави дека развиваат посебна верзија од Firefox наменета специјално за уредите за виртуелна и изменета реалност, па еве ја и првата верзија од таканаречениот Firefox Reality.
Уреди за виртуелна реалност ги има повеќе, од едноставни прилагодени кои го користат мобилниот уред, до специјално развиени и независни платформи како Oculus сега во сопственост на Facebook.
Firefox Reality може да се симне за уредите Oculus, Daydream од Google, како и Viveport.
Со цел да биде погоден за користење, Firefox Reality става акцент на гласовното пребарување, поради се’ уште не толку едноставно и згодно пишување со тастатура во виртуелната реалност. Исто така, како што е случајот со десктоп верзијата, Firefox Reality на својата главна страна истакнува содржина која корисниците на ВР уреди би им била корисна, а пример се игрите.
Firefox Reality иако веќе ги има некои од клучните функции на „обичниот“ Firefox, сепак со тек на време ќе вклучува и повеќе, односно ќе продолжи да биде развиван. Од Mozilla веќе ја најавуваат и 1.1 верзијата која ќе донесе низа на подобрувања.
