Linux отсекогаш беше конкурент на Windows за оние кои знаеја повеќе за компјутерите, како и сите оние кои сакаа поголема безбедност, често и на потсмев на Microsoft. Последниве неколку години тоа целосно се промени – сега не само што Microsoft не зборува против Linux, туку и целосно го прифати како платформа, овозможувајќи да инсталирате дистрибуција во Windows, а сега пушти и официјална Skype апликација за оваа платформа.
Факт е дека бројот на достапни апликации и натаму е проблем во Linux, иако хардкор фановите ќе ви кажат дека има заменска апликација за сите поважни кои ги има на Windows. Сепак, има такви кои немаат добра замена, како на пример Skype, која е особено корисна за бизнис корисниците и компаниите, кои неретко користат Linux оперативни системи.
Сега, Microsoft лансира официјална Skype апликација за Linux, која сигурно работи на Ubuntu 16.04+, Debian 8.5+, Fedora 24+, OpenSuse KDE 13.2+ и OpenSuse Leap 42.1+ KDE, но според корисниците на Linux, може да функционира и на други дистрибуции. Таа е достапна како .RPM или .DEB датотека за инсталација, односно како skypeforlinux-bin за Arch/Antergos/Manjaro корисниците.
Апликацијата личи многу на онаа за Windows и има голем број од нејзините функционалности, како видео повици, но сѐ уште и недостасуваат групни видео повици. Сепак, оваа функционалност би можела да биде достапна наскоро – Skype за Linux е сѐ уште во бета верзија и може да се очекува дека набрзо ќе добие уште неколку освежувања.
