Internet Explorer 11 е најновата верзија на прелистувачот од Microsoft која беше претставена со пуштањето на Windows 8.1. На почетокот достапен само за најновата верзија од оперативниот систем, беше најавено дека наскоро ќе биде достапен и за корисниците на Windows 7 кои до сега сепак можеа да ја користат тест верзијата. Од четврток достапна е финалната верзија на Internet Explorer 11 за сите корисници на Windows 7, која ќе биде автоматски надградена во наредните недели. Доколку не сакате да чекате до автоматската надградба, IE 11 можете да го симнете на следниот линк.
Според Microsoft оваа верзија на прелистувачот е за 9% побрза од претходната 10-та верзија на Internet Explorer, а дури 30% побрза од другите достапни прелистувачи, како Google Chrome и Mozilla Firefox. Брзината се однесува на перформансите при користење на JavaScript и оваа верзија на Internet Explorer доаѓа со Chakra JIT Java компајлер.
Покрај подобрувањата во брзината Internet Explorer 11 доаѓа и со подобрени сигурносни и функции за приватност, како и поддршка за најновата верзија на WebGL и HTML 5 видео без потреба од plug-in. За разлика од IE 11 на Windows 8.1, на Windows 7 прелистувачот не ја користи Google SPDY технологијата. Корисничкиот интерфејс не е променет од претходната верзија, па оваа надградба преставува само надградба во перформансите и компатибилноста со веб технологиите.