Facebook продолжува да ја проширува функционалноста на нивната популарна Messenger апликација. Оваа апликација може да се каже дека успешно конкурира со Viber, WhatsApp и сличните апликации.
Денеска Messenger добива уште една нова функција кој што дефинитивно ќе ја направи многу посериозен конкурент на останатите апликации, а во овој случај и на Skype. Facebook Messenger добива можност за правење на видео повици со корисниците со кои што разговарате.
Како што би очекувале, започнувањето на видео повик е едноставна активност. Се што треба е да притиснете на иконата во горниот десен агол додека сте во делот за разговор со некој од вашите контакти, по што повикот ќе започне.
Повиците можат да се прават само преку мобилната апликација, па сега за сега веб верзијата не е поддржана. Исто така, повиците можат да се прават без разлика на која платформа се наоѓа другата страна, односно тие функционираат помеѓу Android и iOS.
На почеток видео повиците ќе бидат достапни во ограничен број на земји, по што е најавено проширување на листата во наредните месеци. Моменталната листа на достапни земји, во кои што не е Македонија, е следната: Белгија, Канада, Хрватска, Данска, Франција, Грција, Ирска, Лаос, Литванија, Мексико, Нигерија, Норвешка, Оман, Полска, Португалија, Велика Британија, САД и Уругвај.
Извор: Facebook
