После неофицијалната најава од порталите, Microsoft официјално потврди дека се приклучува кон Chromium проектот и ќе продолжи да го развива Edge на основа на овој отворен код.
Тоа значи дека Microsoft Edge ќе добие нова верзија, направена конкретно за десктоп, наместо како до сега „модерна“. Оваа верзија иако ќе продолжи да изгледа како Edge, ќе се однесува повеќе како Google Chrome на десктоп, па сигурно тие што ќе му дадат шанса конечно на Edge, нема да „избегаат“ одма како до сега.
Сепак, сето ова мислам дека ќе биде за џабе доколку Edge не добие поддршка за додатоците од Chrome. Иако прелистувачот ќе биде постабилен, брз и компатибилен со веб страните, сепак без додатоците, повторно ќе биде прашање неговата успешност.
За среќа, Кајл Алден од Microsoft, одговарајќи на прашања на Reddit, истакна дека тие планираат да овозможат поддршка за Chrome додатоците во новиот Edge.
Ова може да значи дека Microsoft потенцијално може да направи и подобар прелистувач од Chrome, поради изгледот и додатните функции карактеристични за Edge, сега засилен со „позадината“ на Chrome.