Stories се едни од најпознатите форми на објава на друштвените мрежи, а скоро и да нема корисник кој не ги користи. Прво претставени на Snapchat, а потоа преземени како начин на објава од страна на Instagram, овие објави со рок на траење од 24 часа се одличен начин да се прикаже нешто што не е замислено да остане на профилот.
Сепак, популарноста на Stories не е баш голема на YouTube, а тоа и не треба да изненадува. За разлика од друштвените мрежи, сервисот за видеа не е баш место каде вакви објави би имале голема намена, а и од компанијата не ги пуштија за доволно корисници.
Поради ова, YouTube веќе нема да има можност за објава на Stories, а оваа промена ќе започне од 26 јуни. Во периодот што следи ќе бидат тргнати поставените објави, односно сервисот целосно ја трга оваа форма на објави.
Тоа што сепак останува и добива се поголема популарност, исто како и кај друштвените мрежи, се Shorts кратките видеа снимени во вертикален формат. Ова е тип на објава кој стана популарен со TikTok, па исто како и со Stories, останатите не оставија да оваа мрежа биде единствената со вакви објави.
Креаторите на YouTube се дополнително мотивирани за објава на овој вид на објави, преку овозможување да се заработува и од нив, а не само од долгите и класични видеа.
