Sony конечно излезе со информацијата кога нивната најнова конзола ќе стане достапна, а и поважно, која ќе биде цената. Како што се очекуваше, Sony PlayStation 5 доаѓа во две различни верзии, па со тоа на корисниците ќе им бидат достапни и две различни цени.
За разлика од Xbox и одлуката на Microsoft да претстави целосно различни две конзоли, Sony се одлучи да двете верзии ги имаат истите карактеристики, а се разликуваат само по начинот на пуштањето на игрите, односно едната верзија доаѓа со Blue-ray читач, а другата е само дигитална.
Цената на стандардната верзија, односно таа со Blue-ray читач ќе биде 499,99 евра, додека на Digital Edition ќе биде за 100 евра пониска и ќе се продава за 399,99 евра. Секако, ќе треба да почекаме дали овие цени ќе важат и во нашата земја.
Инаку, официјалната продажба на PlayStation 5 започнува од 12 ноември во САД и уште неколку други земји, додека во целиот свет ќе започне недела дена покасно, односно од 19 ноември.
Microsoft исто така го најави почетокот на продажбата на Xbox Series X и Xbox Series S, а овие две конзоли ќе се разликуваат и по „јачината“ покрај по достапноста на Blue-ray читач. Xbox Series X ќе се продава по цена од 500 долари, што значи дека Sony избра да иде со истата цена, додека Xbox Series S ќе има цена од 300 долари.
Јасно е дека Xbox Series S мора да биде поевтина од конкурентната верзија кај Sony затоа што оваа конзола ќе има и послаби карактеристики, односно не е само Digital верзија.
Sony, односно PlayStation 5 тука добива голема предност, односно корисниците ќе ја добијат истата конзола за 100 евра помалку, додека кај Microsoft ќе мора да се помират и со послаби перформанси.