Смартфоните од Samsung, па и другите уреди, ќе продолжат да функционираат со помош на Google кога се во прашање пребарувањата на корисниците. Покрај тоа што Chrome доаѓа инсталиран кај овие уреди, Google Search го користи и Samsung Internet апликацијата, а тука е и „виџетот“ поставен на главниот екран.
Оваа информација доаѓа по најавите за можна промена на соработката и префрлување на Bing од Microsoft. Ова е практика која не би чудело да зачести периодов, а директно како резултат на побрзата интеграција на вештачката интелигенција кај Bing, во споредба со Google Search.
Одлуката да се остане со Google сепак е очекувана. Двете компании имаат доста голема соработка, а во најголем дел поради користењето на Android кај телефоните од Samsung. Откажувањето на соработката и падот на бројот на пребарувања преку Google Search е директно намалување на приходите од реклами, нешто што е главниот извор на приходи за компанијата.
Останува секако изборот на корисниците кои можат да го променат во секое време и да постават друг пребарувач во нивните апликации, како и да постават друг виџет на главниот екран.
За промена на соработката можевме да прочитаме како можност и кај Firefox прелистувачот. Договорот помеѓу Google и Mozilla треба да истече оваа година, па постои можноста Microsoft да издејствува нов договор со нив, но ќе видиме.