Гласините за кои повеќето фанови на Pebble часовниците се надеваа дека нема да се остварат, сепак денеска официјално се потврдени од самата компанија. Pebble од оваа недела целосно престанува со работа, а дел од вработените ќе станат дел од исто така познатата компанија Fitbit.
Причината за ова е лошата финансиска состојба во која се наоѓале од Pebble, нешто што не беше јавно прикажано, па за доста корисници информацијата дојде како големо изненадување. Сепак, паметните часовници од Pebble беа едни од најмногу популарните, а посебно поради користењето на e-ink екрани кои овозможуваат многу мала потрошувачка на енергија, па овие часовници не мора да се полнат секој ден како конкурентските.
Од Fitbit, со купувањето на компанијата ќе ги задржат само лиценците за интелектуална сопственост, софтверските инженери и слично. Остатокот, односно производствените погони, дизајнерите и слично ќе бидат затворени и компанијата официјално престанува со постоење и работа.
Работите да бидат уште полоши, сите корисници кои имаат купено Pebble часовник, веќе не може да сметаат на нивната гаранција или било каква корисничка поддршка.
Тие коишто имаат нарачано нови часовници оваа година, односно Pebble 2, Time 2 и Core моделите, може да очекуваат враќање на парите преку Kickstarter идната година.
Престанокот со работа на Pebble, посебно во вакви околности, не е само проблем за корисниците, туку и додава дополнителна дамка на платформите како Kickstarter, кои веќе имаат одреден процент на пропаднати проекти, како и такви кои никогаш немаат профункционирано и покрај собраните средства.
Pebble беше една од најпознатите компании на Kickstarter, па до оваа година тие, барем навидум, функционираа одлично.
Извор: Kickstarter Pebble, TNW, Gizmodo