Ко-основачот на познатиот бренд OnePlus и основач на компанијата Nothing, Карл Пеи, кој имаше доста што да каже за пазарот на смартфони и како неговата компанија ќе претстави нешто поразлично на пазарот, направи рецензија на iPhone 14 Pro.
Дефинитивно е интересно да се видат официјалните ставови на директорот на една компанија за некој нивни конкурент. Ова дополнително е интересно и поради начинот на кој Карл Пеи настапува во јавноста, а и големата споредба која се прави помеѓу Nothing Phone (1) и iPhone поради сличност во изгледот.
Видеото почнува со еден вработен во Nothing кој оди во најблиската Apple продавница и му купува на Пеи iPhone 14 Pro, поради неговата изјава дека би сакал да направи рецензија на некој производ, како што тоа го прават познатите „јутјубери“.
Интересно, Карл Пеи неколку пати прашува дали некој платил за тој телефон, по што решава да го користи неколку денови пред да ги каже неговите ставови. Вработениот дури се јавува до Apple да праша каква им е политиката за враќање на купен производ.
Пеи ја започнува својата рецензија истакнувајќи дека отсекогаш бил фан на Apple, по што продолжува да говори за дизајнот. Кажува дека Dynamic Island исечокот е навистина паметен дизајн, но значењето кое му е дадено е непотребно големо.
Видеото можете да го погледнете во продолжение.
