Nothing ќе ја претстави втората генерација од нивниот смартфон, иако првично кажаа дека тој нема да биде претставен наскоро и дека нема потреба од толку брзи надградби, на 11 јули, точно за една недела од денес.
Nothing Phone (2) ќе биде доста голема надградба во споредба со ланскиот модел, а тоа во главно ќе се види преку неговите карактеристики. За разлика од средно високата класа во која беше првиот модел, оваа година Nothing ќе влезе во висока класа. Овој телефон ќе работи на Snapdragon 8+ Gen 1, па иако тоа не е најновиот чип од Qualcomm, тој е многу блиску до него со перформансите, а ќе овозможи пониска цена на уредот.
Од компанијата прикажаа слика од задниот дел од Nothing Phone (2), по кој и се препознатливи. Повторно телефонот ќе дојде во две „бои“, односно светла и темна, а останува и препознатливиот проѕирен заден дел со повеќе сијалички.
Како што се очекуваше, телефонот не добива некој драстичен редизајн, па може да се каже дека се работи само за освежување. Поставеноста на сијаличките е скоро иста со ланскиот модел, а направени се само мали промени по кои ќе може да се види разликата со претходниот модел.