Во најновиот финансиски извештај кој го објавија од Netflix, стои заклучокот дека донесената мерка да се стави крај на споделувањето на лозинката со пријателите, покажува резултати.
Бројот на корисници кои започнале да плаќаат самите за Netflix, како резултат на мерката, е поголем од тие кои се одлучиле да ја откажат. Со тоа, сервисот има добиено скоро 6 милиони нови корисници.
Овој „успех“ од компанијата се смета како причина да мерката биде проширена во остатокот од светот, па иако нема поконкретни информации, изгледа може да се очекува и во нашата земја.
За разлика од претпоставките пред пуштањето на мерката, доплата може да се направи само за еден дополнителен корисник кој не е дел од истото домаќинство, а цената е доволно висока за да повеќе се исплати тој корисник да почне да си плаќа сам посебна сметка.
Доколку оваа мерка дојде и во Македонија, корисниците кои сакаат да почнат да си плаќаат своја посебна сметка, историјата на гледање, предлозите и слично, односно својот профил можат да го префрлат на таа нова сметка, а по ново и на некоја стара доколку веќе имаат креирано.
Засега доплатата за корисници надвор од истото домаќинство е пуштена во САД, Канада, Нов Зеланд, Португалија и Шпанија.
