Настанот кој Microsoft го најави при крајот на минатиот месец, беше одржан денеска и како што се очекуваше, на него беа претставени неколку нови Surface уреди, односно нови генерации од веќе достапните уреди, а имаше и по нешто ново.

Еден од главните уреди кои беа дел од настанот е уредот кој може да се каже дека ја направи Surface серијата тоа што е денес. Surface Pro стигна до својата деветта верзија и иако истата не донесува некои големи промени во дизајнот, донесува доволно промени за да биде одличен избор, а посебно за тие кои за првпат би се одлучиле за овој уред.

Surface Pro е уредот кој е првично таблет компјутер кој може да се користи и како лаптоп со додавање на тастатурата која во исто време се користи и за заштита на уредот. Исто така, Surface Pro е уредот кој го има „легендарниот“ механизам од Microsoft кој му овозможува потпирање на маса во која позиција и да сака корисникот.

Оваа година, Surface Pro 9 доаѓа и како замена за Surface Pro X со можноста да се купи со ARM чип, наместо со Intel, па Microsoft ги спојува овие два уреди во еден. Дел од дизајнот од Surface Pro X може да се видат во малите рамки околу екранот, нешто што го посакуваа кај другите модели корисниците уште при неговото претставување, a конечно го добија со Surface Pro 8.

Microsoft SQ 3 е чипот кој е направен во соработка со Qualcomm, а класично Surface Pro 9 доаѓа и со можност за избор на Intel чип, во овој случај 12та генерација. Со Intel чип, Surface Pro 9 треба да работи до 50% побрзо од неговиот претходник.

Surface Pro 9 доаѓа со 13 инчен екран кој повторно има 120 херци стапка на освежување, HD камера, насочени микрофони, Omnisonic звучници, како и нов G6 чип кој треба да го направи подобро пишувањето со електронското пенкалце од компанијата.

Оваа година Surface Pro доаѓа и со додатни бои, а направена е и посебна верзија во соработка со дизајнерската компанија од Лондон, Liberty.

Покрај овој уред, Microsoft ја претстави и наредната генерација од нивниот класичен лаптоп, Surface Laptop, кој сега е до петтата верзија. Surface Laptop 5 не донесува нешто многу од аспект на промени, па тука се стандардните подобрувања од генерација до генерација.

12та генерација од Intel чиповите е тука за да овозможи подобри перформанси, а Microsoft најавува до 50% подобри перформанси во споредба со Surface Laptop 4.

Surface Laptop 5 доаѓа со избор од 13,5 и 15 инчен екран заедно со Dolby Vision IQ технологијата која треба да овозможи подобра слика, силни бои и остар контраст. Заедно со ова, звукот доаѓа со поддршка за Dolby Atmos, заедно со ефектот на просторно аудио.

Surface Laptop 5 исто така доаѓа со избор на нови бои, како што беше случајот со Surface Pro 9, а и двата уреди повторно го имаат изборот за Alcantara материјалот.

Surface Studio на овој настан ја доби својата 2+ верзија, интересно, што значи дека од компанијата надградбата не сакаат да ја претстават како голема за целосно нова бројка. Ова е се-во-едно компјутерот од Microsoft кој привлече големо внимание кога првпат беше претставен со својот 28 инчен екран и можност за скоро целосно „легнување“ на масата и со тоа овозможувајќи користење на Surface Pen.

Surface Studio 2+ доаѓа со нова генерација на чип, односно Intel Core i7 H серијата и повторно Microsoft најавува 50% подобрување кај перформансите во споредба со претходниот модел.

Доста добра надградба доаѓа кај страна на графиката, па Surface Studio 2+ доаѓа со Nvidia GeForce RTX 3060, иако Microsoft тука можеле и подобро.

На овој настан Microsoft претстави уште еден интересен уред, Microsoft Audio Dock. Се работи за уред кој во основа е звучник, но овозможува поврзување на компјутер со екран и негово полнење, од каде и името „dock“. Замислен за видео конференции, овозможува одличен звук, а во него се вградени и два микрофони со технологија за намалување на шумовите и бучавата.

Покрај овие уреди, Microsoft претстави и далечински управувач за Microsoft Teams, Xbox Adaptive Controller, интеграција на iCloud Photos во новата Photos апликација, како и нова Microsoft Designer апликација како дел од Microsoft 365 пакетот.

ИЗВОРMicrosoft
Претходна статијаSamsung ќе го лиценцира Tizen OS да се користи и кај други брендови на телевизори
Следна статијаНовата Photos апликација во Windows 11 ќе добие интеграција со iCloud
Својот интерес во областа на паметната технологија го развива одамна како хоби кое што прераснува во нешто повеќе, па резултатот на тоа е и развојот на овој портал. Сака да ги следи сите новини поврзани со оперативните системи, апликациите, мобилните телефони, но и интересните научни и вселенски истражувања.