На Microsoft Build 2015 конференцијата која што се одржува оваа недела, Microsoft го претстави официјалното име на досега нарекуваниот Project Spartan интернет прелистувач. Ова е новиот прелистувач кој што ќе го замени Internet Explorer во Windows 10.
Официјалното име на новиот прелистувач е Microsoft Edge и е исто како новата веб технологија која што се користи во прелистувачот.
Како и целиот оперативен систем, Edge е се’ уште во тест фаза, а корисниците веќе одреден период можат да го тестираат доколку ја користат тест верзијата од Windows 10.
Прелистувачот е направен со минималистички кориснички интерфејс кој што треба да го стави акцентот на сурфањето. Доаѓа со вградени можности како што се reading mode, цртање и обележување на веб страните, Cortana и слично.
Она што е навистина интересно е најавата од Microsoft дека сите достапни додатоци за Chrome и Firefox многу лесно ќе можат да се прилагодат да работат на Edge. Ова е исто како најавата за лесно прилагодување на апликациите од iOS и Android да работат на Windows 10, па останува да видиме дали целата процедура е навистина толку едноставна како што тврдат од компанијата.
Логото кое што ќе го има Edge е скоро исто како тоа на Internet Explorer, односно и во овој случај се користи малата „е“ буква. Се разбира дизајнот на буквата е нешто различен, а според некои и покрај непопуларноста на IE, сепак оваа икона многу луѓе ги асоцира на интернет генерално.
