Meta вчера го одржа нивниот Connect 2024 настан на кој беа претставени неколку интересни уреди, а еден од нив е „продолжетокот“ на ланскиот Meta Quest 3, овој пат во поевтина верзија.
Meta Quest 3S доаѓа со пониска цена, а скоро со истите карактеристики од ланскиот посилен модел. Разликата во главно може да се најде кај резолуцијата на екраните, но што се однесува до чипот, брзината на работа и другите функции, овој уред ги нуди сите од посилната верзија.
Цената по која ќе се продава Meta Quest 3S започнува од 299,99 долари, а за корисниците кои сакаат поголем простор за податоци цената ќе биде нешто повисока. Со претставувањето на Quest 3S, намалување на цената добива и ланскиот Quest 3, па верзијата со 512GB од 649,99 се намалува на 499,99 долари.
Ова секако се цени во САД, а достапноста на овие уреди во Македонија не е секогаш баш како што би сакале.
Од Meta новиот уред го промовираат како уред за корисниците кои првпат би сакале да пробаат виртуелна реалност, како и за тие кои чекале нешто пониска цена од претходните модели.
