Марк Гурман веќе најави дека наредниот Mac mini, кој ќе дојде со М4 чипот, ќе добие одамна потребен редизајн. Овој редизајн нема да го промени нешто посебно целосниот изглед на уредот, туку ќе го направи доста помал, односно се најавува големина слична со таа на Apple TV уредот.
Тоа значи дека Mac mini ќе стане навистина „мини“ компјутер, а тој веќе е доста мал и може едноставно да се постави на било каква позиција на масата.
Во најновиот неделен билтен, Гурман објавува уште неколку информации поврзани со овој компјутер.
Залихи од Mac mini ќе почнат да се доставуваат на почетокот од овој месец, а тие за Mac mini Pro се планирани за почетокот на идниот. Тоа значи дека претставувањето може да се очекува идниот месец, а заедно со двата Mac mini се очекуваат и нови iMac и MacBook Pro.
Гурман додава дека Mac mini ќе дојде со вградено напојување, што значи корисниците ќе имаат само обичен кабел за нивниот нов компјутер, што е одлично.
На крај, Гурман најавува дека Mac mini Pro ќе дојде со пет USB-C приклучоци, три на задната и два на предната страна како што е случајот кај Mac Studio.
Тоа што ќе биде поголема промена е тргањето на USB-A приклучокот, па оваа промена можно е да предизвика повеќе реакции од страна на корисниците. Повеќето „докови“ и слични приклучоци се’ уште функционираат преку овој приклучок, па можно е доста корисници да треба да купуваат нови додатоци.
Пред претставувањето на новите Mac компјутери, сега го имаме претставувањето на iPhone 16 серијата кое ќе биде на 9 септември, односно идниот понеделник.
