Пред скоро две недели, еден од најпознатите YouTube канали, Linus Tech Tips, беше погоден од според нас непотребна драма создадена од обвинувања кои започнаа од конкурентен канал, па отидоа и до обвинувања за сексуално малтретирање.
Се започна со обвинувања од конкурентниот канал Gamers Nexus за видео од Linus Tech Tips во кое тие тестираат производ за ладење на компјутерите од компанијата Billet Labs. Тие наводно, не само што не биле фер и професионални во тестирањето, дури го продале производот без дозвола од компанијата.
Ова обвинување се прошири со цела дискусија на повеќе места за тоа како каналот почнал повеќе да дава значење на објава на што повеќе видеа, наместо на нивниот квалитетот, по што дојде најавата дека Linus Tech Tips ќе направи пауза од недела дена за да ги организира промените внатре во компанијата.
После скоро десет дена, не седум, Linux Tech Tips го објави своето прво видео (на крајот од статијата), а во истото Лајнус повторно дава кратко мислење за случувањата и продолжува со план за што е тоа што отсега, па натаму ќе го прават со цел да се задржи квалитетот на содржината.
Една од главните новини е помал број на видеа во текот на денот, надополнето со систем за проверка на тие видеа, па ќе видиме како ќе реагираат фановите, кои според информациите, дел веќе се имаат откажано од овој канал, како и поврзаните.
Иако YouTube канал со повеќе од 15 милиони претплатници има одредена одговорност, а посебно за точноста на тоа што се објавува, сепак веруваме дека дел од „драмата“ која се направи е целосно непотребна и е типична за времето во кое живееме.
Гледачите можат слободно да ги критикуваат грешките и да престанат да ги гледаат видеата, па и да не го следат веќе каналот, но работите да отидат и до обвинувања за сексуално малтретирање, е претерано и се користи секогаш кога некоја компанија има одредени „проблеми“.
Новото видео можете да го погледнете во продолжение.
