Едно од главните прашања што корисниците кои се мислат за купување на Huawei телефон го имаат е дали недостатокот на Play Store и другите Google апликации е нешто што може да претставува проблем и да по купувањето на телефонот почнат да се премислуваат за таа одлука.
Со оглед на тоа што го добивме на користење Huawei P40 Pro, решивме да покрај неговото генерално тестирање и проценка на корисничкото искуство, посебно внимание посветиме на апликациите, односно изборот кој го има AppGallery и сложеноста на другите опции кои им се достапни на корисниците за да можат да ги имаат сите апликации кои им се потребни.
На крајот, не е до бројката на апликации, туку до можноста да се инсталираат токму тие 10тина апликации кои сите од нас најмногу ги користиме, па мерењето на колку апликации се достапни во едната и во другата продавница реално не покажува многу.
Достапност на апликации во AppGallery
Уште веднаш треба да ви е јасно дека дел од најмногу популарните апликации нема да ги има во продавницата за апликации од Huawei. Затоа тука се два начина на кои овие апликации можете лесно да ги инсталирате, а кои се тие можете да прочитате подолу во статијата.
Ова значи дека покрај апликациите од Google, во AppGallery ги нема ни Facebook, Twitter, Instagram и Messenger. Сепак, доста други апликации се достапни, а има и доста добри алтернативи на тоа што не може да се најде.
Што е тоа што веднаш е достапно. Една од најкористените апликации кај нас е Viber, за разлика од западот каде се користи повеќе WhatsApp. Viber веднаш им е достапен на корисниците и може да се инсталира директно од AppGallery.
Како што веќе пишувавме, Huawei доби одлична алтернатива на Google Maps, а тоа е познатата апликација HERE WeGo. Истата не е единствената која е достапна во AppGallery, па можете да ги симнете и MAPS.ME, Sygic, како и многу популарната апликација OsmAnd – Offline Maps & GPS Navigation.
Интересно, во AppGallery може да се најдат и неколку апликации од Microsoft, па тука е новата Office апликација која ги интегрира во едно Word, Excel, PowerPoint, како и функциите од Office Lens. Од Microsoft достапна е и Microsoft News, како и одличната алтернативна тастатура SwiftKey.
На AppGallery можат да се најдат и македонски апликации како што се: AirCare, Mojot A1, m-Banking by Stopanska Banka.
Други апликации кои се познати, па би ги издвоиле од големиот број на апликации се и следните:
- AccuWeather Weather Radar & Live Rain Forecast
- Speedtest by Ookla
- Aliexpress
- Textra SMS
- Snapchat
- TikTok
- Deezer
- Kodi
- NordVPN
- Opera Mini
Како едноставно да ги инсталирате апликациите кои не можете да ги најдете во AppGallery
Како што можете да видите, изборот на апликации воопшто не е мал и лош, а бројот само ќе се зголемува со тек на време. Сепак, дел од апликациите кои секојдневно ги користиме ги нема, па ќе треба да употребите две кратки процедури за да ги имате и тие апликации.
Првиот начин на којшто можете да ги инсталирате сите апликации кои сте ги користеле и досега е преку апликацијата Phone Clone. Истата е наменета да ги префрлите сите ваши работи од стариот на новиот телефон, а тој и не мора да е Huawei. Во видеото во продолжение можете да ја видите кратката процедура за користење на оваа апликација, а после истото ќе ги имате сите ваши апликации на вашиот нов Huawei телефон.
Има уште еден начин да дојдете до апликациите кои не можете да ги најдете во AppGallery, а тоа е преку апликацијата MoreApps. Истата е достапна во AppGallery и преку неа можете да ги најдете буквално сите апликации. Преку оваа апликација можете да ја симнете .apk датотеката која се користи за инсталација на апликации во Android надвор од продавниците. Оваа апликација исто така многу лесно се користи, а во продолжение е видео во кое можете да ја видите едноставната процедура.
Препорачуваме да од време на време повторно ги симнувате инсталираните апликации преку MoreApps за да ги имате најновите верзии.
Ние на нашиот Huawei P40 Pro ги пробавме сите начини кои се достапни за да се инсталираат апликации и можеме да заклучиме дека тие се едноставни и не го менуваат одличното корисничко искуство кое и самите знаете какво е на еден Huawei телефон.
Кога ќе ги инсталирате неколкуте недостапни апликации, ќе се научите се повеќе да ја користите AppGallery и самите ќе откривате одлични апликации кои ви се потребни за разни ситуации.
