Очекувано неколку години веќе, Европската Комисија отвори истрага за можно прекршување на правилата за конкуренција во ЕУ од страна на Microsoft. Во овој случај конкретно се мисли на вклучувањето на Microsoft Teams сервисот во веќе популарниот Office пакет, односно сега Microsoft 365 сервис.
Проблемот стана поистакнат во 2020 година на почетокот од корона кризата, кога огромен број на луѓе почнаа да работат од дома, па ваквите апликации добија на популарност.
Со вклучувањето на Microsoft Teams, од компанијата прават да корисниците немаат потреба да гледаат кај конкуренцијата за решение, а посебно што за тоа не треба да доплатат.
Веќе можеше да прочитаме дека Microsoft планира да го издвои Teams сервисот од Microsoft 365, но тоа очигледно не ја спречи истрагата од страна на Европската Комисија.
„Microsoft го вклучува Teams во своите добро етаблирани пакети за продуктивност базирани на облак за деловни клиенти Office 365 и Microsoft 365. Комисијата е загрижена дека Microsoft може да ја злоупотребува и брани својата пазарна позиција во софтверите за продуктивност со ограничување на конкуренцијата во Европската економска област (ЕЕА ‘) за производи за комуникација и соработка.“ – истакнуваат од Комисијата.
Посебно се истакнува жалбата поднесена од страна на еден од најголемите конкуренти на Teams, Slack, кои обвинуваат дека Microsoft нелегално го има поврзано Teams со своите доминантни пакети за продуктивност.
Од компанијата веќе се во контакт со ЕК, па ќе видиме во кој правец ќе се движат работите.
