Сега станува појасно зошто Елон Маск толку ја форсира повисоката претплата за Twitter Blue и ја прави повеќе привлечна да ја плаќаат поголем процент од корисниците, за разлика од претходно.
Тој за време на поголем состанок во компанијата истакнал дека не може да се исклучи можноста Twitter да банкротира. Компанијата според информациите нема направено профит од 2019 година, а и самиот Маск еднаш истакна дека дневно губи по 4 милиони долари.
Во пораката која Маск ја испрати до вработените, во која ги информира и дека веќе нема да можат да работат од дома, тој истакна дека целта треба да биде половина од приходите на Twitter да доаѓаат од претплати.
Проблемот со приходи во компанијата дополнително се зголемува и поради откажувањето на дел од огласувачите поради притисок од разните „woke“ движења и слични.
Од друга страна, Twitter овој период има доста зголемена популарност, очекувано со оглед на случувањата, па доколку се успее да се среди ситуацијата со огласувачите, работите би требало да може да се стават во контрола.
Минатата недела официјално беше пуштена новата Twitter Blue претплата, но повторно се појавија проблеми со имитирање на профили, по што беше привремено повлечена. Се добива впечаток дека потребата од брзо добивање на приходи остава простор за доста непромислени одлуки.