Четири европски телекомуникациски компании стануваат конкуренција на главниот бизнис на Google и Meta, а тоа е дигиталниот маркетинг, односно онлајн огласувањето. Компаниите ги вклучуваат германската Deutsche Telekom, шпанската Telefonica, британската Vodafone и француската Orange.
Компаниите ќе формираат посебна компанија во која имаат еднакво учество, која ќе биде водена од независни менаџери, а е со седиште во Белгија. За компанијата веќе е формиран надзорен одбор со членови кои се избрани од страна на акционерите.
Тоа што е најважно е што заедничката компанија има добиено дозвола од Европската Унија, која како што знаеме е доста строга кога се во прашање големи компании и влијанието на пазарот.
Новата платформа за рекламирање е развиена од страна на Vodafone и веќе се тестира во Германија изминатите година дена.
Главната карактеристика која се истакнува е почитувањето на приватноста на корисниците преку почитување на законите како GDPR и ePrivacy Directive од ЕУ.
Според информациите од заедничкото соопштение, корисниците ќе треба сами да изберат дали и од кога би сакале да гледаат реклами, а тој избор ќе можат да го менуваат кога сакаат.
Исто така, следењето на корисниците ќе биде направено само на основа на псевдо-анонимен дигитален токен, како што се истакнува, а овој токен наводно не може да биде пробиен со обратен инженеринг.
Дали новата компанија ќе може да успее да земе поголем дел од пазарот на Google и Meta, ќе биде навистина интересно да се види.
