ARM, компанијата која стои зад дизајнот на најмногу користените и најдобрите чипови кај смартфоните, а изминатите години и кај компјутерите, ја претстави наредната генерација од нивните дизајни.
Новата генерација доаѓа како дел од новата платформа која ARM ја нарекува CSS for Client, а за оваа платформа се истакнува дека е најбрзата досега кога се во прашање Android смартфоните.
Со оглед на конечното пуштање на Windows конкуренцијата на MacBook, Copilot+ компјутерите, може да се очекува користење на овие нови чип дизајни и кај оваа категорија на производи.
Кај Cortex-X серијата се најавуваат доволно големи подобрувања што наследникот на Cortex-X4 оваа година е наречен Corte-X925. Овој чип се најавува дека треба да донесе 36% подобрени перформанси на еден „thread“, додека подобрувањата кај вештачката интелигенција се дури 46%.
Кај новите уреди кои ќе работат со ваков чип може да се очекува генерално подобрување на перформансите од 30%.
Cortex-A725 треба да донесе подобрување од 35% кај ефикасноста на перформансите, што ова не е директно направена споредба кај перформансите на чипот. Во случајот со потрошувачката на енергија, Cortex-A725 доаѓа со 25% подобрување од ланскиот модел.
Јадрата кои се наменети за заштеда на енергија обично се Cortex-A520 и оваа година тие добиваат само освежување, односно не целосно нов модел. Подобрувањата кај потрошувачката може да се очекуваат околу 15%.
Сите подобрувања може да се каже дека во голем дел се должат на подготвеноста за 3nm процес на производство, покрај промените во дизајнот од страна на ARM.
Нова генерација добива и графичкиот процесор, па оваа година доаѓа Immortalis G925, кој секако доаѓа со поддршка за „ray tracing“.
