Apple официјално го најави одржувањето на нивната годишна WWDC – World Wide Developer Conference и оваа година таа ќе започне на 10 јуни и ќе трае до 14 јуни.
Тоа што започна како нешто наметнато од пандемијата во 2020, сега продолжува како стандардна практика, па конференцијата повторно ќе биде онлајн, а не како порано со присуство на голем број на публика.
За дел од програмерите и студентите, Apple повторно ќе овозможи физичко присуство, а присутните ќе можат да ја следат конференцијата, да разговараат со членови на тимот на компанијата, како и да учествуваат во неколку специјални активности.
Како и секоја година, тоа што нас не интересира е претставувањето на наредната генерација од оперативните системи од Apple. Оваа година на ред доаѓаат iOS 18, iPadOS 18, tvOS 18, macOS 15, watchOS 11 и visionOS 2.
Иако секоја година донесува интересни новини, која повеќе, која помалку, сепак оваа година е нешто поразлична. За iOS 18 се најавува дека ќе биде најголемата надградба досега, а покрај промените во корисничкиот интерфејс, се очекуваат големи најави поврзани со генеративната вештачка интелигенција.
Конференцијата ќе може да се следи од страната на Apple, како и преку нивниот YouTube канал.