Оваа дата веќе беше неофицијално спомената како датата кога Apple ќе го одржи нивниот стандарден есенски настан на којшто ги прикажува новите генерации од нивните iPhone телефони. Оваа дата сега е официјално потврдена и од компанијата почнаа да ги испраќаат поканите до медиумите и јавноста.
Настанот ќе се одржи во Apple Park, односно во седиштето на компанијата во Калифорнија со почеток од 19:00 часот. Настанот како и обично ќе може да се гледа во живо, меѓутоа ако остане како минатите години, нема да може да се гледа од сите прелистувачи.
iPhone XR, XS и XS Max се последните модели од минатата година кои ќе треба да ги добијат своите наследници. Се верува дека Apple ќе остане на истата бројка на модели, а ќе го задржи и нивниот стил, односно категорија.
Не се очекуваат некои значајни новини кај овие телефони. Тие би требало да добијат тројна камера на задната страна, барем кај двата посилни модели, а исто така и нова генерација од чипот којшто Apple го развива за своите уреди.
Кратко кажано, оваа година се очекува телефоните да бидат само засилени со понови компоненти, а од аспект на нови функции и нешто интересно, најверојатно ќе остане за идната година.
