Еве уште еден патент за уред кој ќе не доближи до еволуцијата во киборзи – Sony развива контактна леќа која ќе може да фотографира и да снима видео, а ќе се контролира само со трепкање на окото.
Леќите кои ги развива Sony имаат специјален фотографски сензор со многу мали димензии, како и специјален медиум за зачувување на датотеките. Овие контактни леќи ќе можат да се поврзат со паметен телефон и таму директно да го префрлат снименото видео, со цел нели потоа да го споделите на социјалните мрежи.
Сепак, леќите имаат и вграден дисплеј, доколку корисникот сака да ги прегледа видеата по снимањето! Замислете да можете да гледате видео само на вашата контактна леќа – исто како „флешбек“ сцени од вашиот живот кои сте ги доживеале претходно. Со таа разлика што ќе бидат со многу послаб квалитет, но тоа е и очекувано.
Леќите инаку ќе се управуваат само со трепкање на окото. Според патентот, тие ќе можат да распознаат меѓу намерно трепкање и ненамерно трепкање, бидејќи намерното ќе биде подолго. Така, на пример леќите би можеле да фотографираат веднаш после малку подолго трепкање со окото, да снимаат видео со две трепкања одеднаш итн.
Патентот на Sony не е единствен досега – веќе знаеме дека Samsung и Google развиваат вакви паметни контактни леќи, кои може буквално да направат револуција во начинот на кој ја користиме технологијата. А бидејќи три големи играчи веќе имаат патентирано вакви уреди, очекувајте промоцијата да се случи уште наредниве неколку години.
Извор: IFL Science, Mashable, CNET
