На самиот почеток, би сакал да Ве прашам: дали сте задоволни од Вашиот кабелски оператор? Дали можете да ги гледате Вашите омилени серии и филмови, да го следите Вашиот омилен фудбалски клуб и во исто време да имате избор каков коментатор сакате да слушате, да гледате NBA, бокс, Формула 1 … Ако одговорот е не, тогаш продолжете со читање.
Постојат неколку сервиси кои нудат гледање на филмови и серии преку Интернет, како на пример Netflix, Hulu, Amazon Prime, Crackle, HBO NOW, но сите тие имаа различна содржина и секако, ќе Ви побараат одредена месечна претплата според тоа која содржина сакате да ја гледате и на колку уреди сакате да го користите сервисот, а исто така, во Македонија содржината е различна и ограничена. Или пак, доколку сакате да гледате спорт, постојат сервиси како NBA, Sky Sports и FOX Sports Go, но и кај нив содржината е ограничена.
Замислете се во ситуација да сакате да ги гледате Game of Thrones, The Walking Dead, How to Get Away with Murder и Vikings, ќе треба да се претплатите на повеќе сервиси доколку сакате да ги гледате сите 4 серии. Не сум против претплатата, бидејќи на тој начин опстојуваат тие серии. Но, во наши услови и со наши кабелски оператори тоа ми е малку неприфатливо.
Интернетот нуди многу можности, а една од нив е да ги гледате Вашите омилени ТВ серии, филмови и спортски натпревари во живо, без никаква месечна претплата. Потребни Ви се само компјутер, Интернет и Kodi. Инсталацијата на Kodi е прилично лесна, потешко е она што следи после инсталацијата на самиот софтвер. Во продолжение ќе Ви објаснам како да го инсталирате Kodi и како и кои “извори” (Sources) да ги инсталирате.
Kodi исто така можете да го инсталирате и на Android уредот од NeoTV, па да гледате директно од вашиот телевизор.
Инсталација на Kodi
Од Вашиот интернет пребарувач отидете на следниот линк и подолу на страната преземете ја Kodi за Вашиот оперативен систем. Бидејќи јас го користам MacOS Sierra, ќе ја спуштам Kodi за Mac.
Следно што треба да направите е да ја стартувате преземената датотека и да ја инсталирате Kodi. Процедурата за инсталација е многу слична и кај Mac и кај Windows оперативните системи.
Инсталација на извори (Sources)
Инсталацијата на Kodi е лесниот дел, потешкиот е во инсталацијата и пронаоѓањето на вистинските извори (Sources). Изворите кои ги користам јас се:
- Exodus и 1Channel за филмови и серии
- Macedonia On Demand и Croatia On Demand за телевизија во живо.
- FilmOn.TV за спорт, филмови и серии
Инсталацијата на овие извори е малку комплицирана, затоа ќе Ви ги објаснам чекорите кои треба да ги направите:
- Отворете ја Kodi, отидете во System и изберете File manager
- Кликнете два пати на Add Source да додадате локација од каде што ќе инсталирате Source.
- Кликнете None и впишете ја следната адреса: http://fusion.tvaddons.ag, кликнете Done и именувајте ја локацијата fusion и кликнете OK.
Со ова, ја инсталиравме локацијата Fusion од каде што ќе го инсталираме додатокот Addon Installer со кој ќе можеме да инсталираме голем број на Sources за да не одиме еден по еден низ Fusion.
Следно што треба да направиме е инсталација на Addon Installer.
- Вратете се на Home Screen и од таму во Add-ons
- Кликнете на Gear Icon и селектирајте Unknown Sources од менито Add-ons.
- Вратете се назад и кликнете на иконата како пакет во горната лева страна.
- Од таму изберете Install from Zip File
- Одете до fusion/begin-here/ и кликнете на plugin.program.addoninstaller-x.x.x.zip
- Одете на Home Screen и од таму во Add-ons менито изберете Addon Installer.
- Одберете Featured Addons за најпопуларните Sources.
Откако ќе инсталирате некој Source, ќе мора мануелно да го активирате, бидејќи во 17-та верзија на Kodi не се активираате автоматски. За тоа да го направите ќе морате да одите во My Add-ons од Add-ons менито од Home Screen. Кликнете на Video Addons и изберете го саканиот додаток кој што сте го инсталирале за да го активирате и кликнете Enable.
