Еден од најдобрите прозиводи на Microsoft во моментов е Cortana, дигиталниот асистент кој можат да го користат најголем број на корисници – оние со Windows 10 компјутер или смартфон, Android и iOS смартфон. Со новата “Creators Update” надградба за Windows 10, Cortana сега ќе биде достапна и за IoT уредите низ нашиот дом.
Оваа надградба треба да пристигне во март наредната година, но мислам дека ќе помине уште малку време додека Cortana не биде вистински достапна во новите “Internet of Things” уреди. Имено, за да можеме да разговараме со Cortana во овие уреди, неа ќе треба да ја вградат производителите на уредите.
Но, кои IoT уреди би можеле да ја користат Cortana? Во наредниве неколку години, скоро секој производ во нашите кујни ќе биде поврзан со интернет. На пример, пред да го отворите фрижидерот, ќе можете да ја прашате Cortana колку калории има јадењето кое би сакале да го извадите. Исто така, Cortana може да се вградува и во системите за климатизирање, каде може да се искористи за контролирање на температурата само со гласовни команди.
Сите вакви уреди ќе бидат опремени и со дисплеи. Корисничкиот интерфејс ќе биде ист како на Cortana за сите други уреди, што значи дека таа ќе може и визуелно да прикаже многу информации. На пример, од неа ќе може да побарате да ви пушти видео од некој рецепт доколку сакате да готвите и сл.
Со “Creators Update”, Microsoft ќе овозможи и разговарање со Cortana од далеку преку Home Hub. Ова значи дека уредите со оваа надградба ќе можат да го слушнат корисникот и преку цела соба, што е многу потребно за лесно контролирање на IoT уредите. Наскоро, Cortana би можела да доживее и надградба која ќе го подобри интерфејсот за уште полесно користење само со говорни команди.
