Creators Update веќе почна да биде достапен за компјутерите, лаптопите и таблетите, а сега го добиваат и оние (малку) корисници со Windows 10 Mobile (верзија 15063.251). Сепак, за прв пат од лансирањето на Windows 10 Mobile, голем број на уреди се тргнати од листата за надградба и тоа многу популарни, како Lumia 930 и 1520.
Всушност, листата на уреди кои ќе ја добијат надградбата е исклучително мала: Alcatel IDOL 4S, Alcatel OneTouch Fierce XL, HP Elite x3, Lenovo Softbank 503L, MCJ Madosma Q60, Microsoft Lumia 550, Microsoft Lumia 640/640XL, Microsoft Lumia 650, Microsoft Lumia 950/950 XL, Trinity NuAns Neo, VAIO VPB051. Од овие паметни телефони, многу малку забележаа каков и да било успех на пазарот и затоа оваа надградба и нема да помине особено забележано.
Исто така, таа не донесува особено големи новитети. Поточно, има само мали промени во Settings и во Microsoft Edge, како и подобрување на целосните перформанси на системот. Ова е сепак многу малку за корисниците на овие смартфони, кои во екот на пад на продажбата на вакви телефони, очекуваа дека барем ќе бидат наградени што се одлучиле за ваков телефон со поквалитетни надградби.
Од друга страна, ваквиот развој на настаните најавува дека Microsoft веќе не планира Windows 10 Mobile да е платформата која ќе ја користат за своите паметни телефони, поточно преносни уреди. Во иднина, очекувајте уреди со Windows 10 на ARM процесори, верзија на која ќе може да се инсталираат и најнормални Win32 x86 и x64 програми, како на пример целосен Office 2016 и Photoshop.
