Microsoft пред скоро една година објави дека Linux ќе може да работи во Windows 10, а сега тие покажуваат „љубов“ кон отоврената платформа и со развивање на една од своите најпопуларни апликации, Skype.
Skype за Linux веќе влезе во бета верзија, што значи дека не би требало да помине многу време пред да биде достапна финалната верзија. Најновата надградба донесува многу функционалности кои одамна ги има за останатите платформи, како можност за ѕвонење кон мобилни и фиксни телефони, нормално доколку имате Skype кредит, но и можност за воспоставување видео повици со други платформи. Досега, тоа беше возможно само меѓу Skype корисници на Linux, што е огромно ограничување. Исто така, во оваа верзија е возможно и „споделување на екраните“ меѓу десктоп оперативните системи, слично на можностите што ги имаат програмите од типот на “Team Viewer”.
Linux beta 5.0 сепак и натаму има недостатоци во однос на Skype за Windows, Android, Mac OS и iOS, како на пример сѐ уште е невозможно да се воспостави групен видео повик, што значи дека невозможни се и видео конференциите. Како и да е, верувам дека во финалната верзија ќе биде додадена и оваа функционалност и Linux конечно ќе добие достоен Skype клиент.
Skype за Linux е многу важен за ширењето на системот за комуникација на Microsoft – овој оперативен систем го користат многу компании, но и многу дивелопери за развој на своите нови програми и апликации.
Извор: Venture Beat, Neowin, Engadget
