Windows 10 е оперативен систем кој денес доаѓа во неколку изведби, кои според тоа што го нудат немаат проблем да ги задоволат потребите на сите различни корисници. Сепак, од Microsoft мислат дека сѐ уште има простор за напредок – планираат нова верзија наречена “Windows 10 Pro for Workstation”, која ќе донесе неколку подобрувања важни за оние корисници кои бараат максимум од својата компјутерска машина.
Поточно, оваа верзија ќе биде наменета за компјутери кои можат да се користат и како сервери, но ќе биде различна од Windows Server изведбите, по тоа што повторно ќе биде повеќе насочена кон единечен корисник. Сепак, за полесно поврзување на неколку други компјутери, оваа “Windows 10 Pro for Workstation” ќе овозможи полесно и побрзо споделување датотеки меѓу компјутерите (преку SMBDirect протокол), поеластичен “file system storage”, поддршка за голем број на серверски компоненти и посебен Workstation Mode кој овозможува највисоки перформанси ис стабилност на системот.
Оваа верзија на Windows 10 треба да биде наскоро достапна, но тоа не треба да значи дека треба да побрзате да ја инсталирате. Таа сепак ќе биде наменета за компјутерите со повеќе процесори, како на пример оние од Xeon серијата и нема да има реална потреба да ја инсталирате и во вашиот компјутер, односно нема да имате реални придобивки од неа.
Извор: TechnoBuffalo, The Verge, Extreme Tech
