Windows 10 Mobile можеби не е целосно мртов оперативен (еко) систем, но дефинитивно виси на конец. За ова доказ е што многу популарни Lumia уреди кои досега добиваа нови надградби, веќе нема да бидат поддржани, освен за сигурносни надградби.

Тука спаѓаат и смартфони како Lumia 930 и Lumia 1520, кои сѐ уште се популарни меѓу фановите на Windows за телефоните. Отсега, единствени модели кои ќе добиваат надградби со нови функционалности се Lumia 950/950 XL, HP Elite X3, Lumia 550, Lumia 650, Lumia 640/640 XL, Acatel Idol 4S, Alcatel OneTouch Fierce XL, SoftBank 503LV, VAIO Phone Biz, MouseComputer MADOSMA Q601 и Trinity NuAns NEO.

Покрај оваа најава, Microsoft на некој начин го подели Windows 10 Mobile од Windows 10 и покрај тоа што долго време се обидуваа да ги спојат. Поточно, Mobile верзиите веќе нема да бидат исти со оние на целосниот Windows 10, а дури и последната надградба која ја добија уредите споменати погоре, според Microsoft не е Creators Update. Таа ќе пристигне на 25 април.

Отсега, дури и имињата на надградбите ќе бидат различни. Windows 10 Mobile надградбата нема да биде Redstone 2, туку Feature 2. Ова се очекува да продолжи и во иднина, што е дополнителна диференцијација на двата оперативни системи. Со овие потези, се чини дека Microsoft сам почнува да го турка Mobile делот во заборав. Лично, сѐ уште сум оптимист дека спремаат нешто ново со Surface Phone тип на уред, но во моментов ситуацијата е очајна.

Извор: ARS Technica, Engadget

Претходна статијаПремиум iPhone телефонот без рамка околу дисплејот ќе пристигне покасно од очекуваното
Следна статијаMicrosoft ќе лансира нов Surface Cloudbook таблет/лаптоп