Microsoft наскоро треба да претстави нова верзија на Windows 10, наречена Cloud, на која ќе може да се инсталираат апликации само од Windows Store. Овој оперативен систем ќе биде насочен директно кон Chrome OS, кој има особено голем успех во САД и кај помладата популација.
Windows 10 Cloud ќе биде делумно полесен оперативен систем од стандардната 10-ка. Затоа, Microsoft цели на перформанси како на Chrome OS, односно траење на батеријата преку 10 часа, брзо стартување на оперативниот систем (околу 20 секунди) итн. Подолу на сликата може да се види што Microsoft очекува од овој систем во секој параметар, а споредено со Chrome OS.
Windows 10 Cloud ќе има и интересни минимални хардверски побарувања, кои не се премногу ниски, односно се многу повисоки од класичниот Windows 10. Идејата е сигурно да се овозможат добри перформанси, бидејќи иако полесен од стандардната 10-ка, Cloud системот ќе може да пушта целосни x86 Windows програми, иако тие ќе треба да се инсталираат преку Windows Store.
Ова значи дека за некој производител да може да продава Windows 10 Cloud лаптоп, во него ќе мора да вградува минимум процесор со четири јадра (како на пример Celeron), 4 GB рам меморија, 32 GB простор за 32 битен систем, 64 GB за 64 битен систем, батерија со капацитет поголем од 40 Whr, брз eMMC или SSD диск и опционално, поддршка за дигитално пенкалце.
