Со цел намалување на финансиската зависност од Google, а најмногу поради развојот на сопствениот Chrome, Mozilla реши сопственото финансирање да го бара на други страни. Па така, во 2014 главниот пребарувач во Firefox стана Yahoo, за корисниците во САД и уште неколку земји, а локално популарните пребарувачи беа ставени во земји како Русија и Кина.
Договорот којшто Mozilla го направи со Yahoo беше потпишан на 5 години, што значи дека тој е раскинат 1 година порано. Од Mozilla истакнуваат дека се искористени одредени клаузули од договорот со што е овозможено раскинувањето без никакви проблеми.
Причината за ваквата одлука не е позната, меѓутоа со оглед на случувањата околу Yahoo и продажбата на компанијата, сигурно го става Google во многу подобра позиција кога е во прашање избор.
Од најновата верзија на Firefox, која дојде со досега најголеми промени, Google повторно е главниот пребарувач во прелистувачот. Корисниците, како и досега ќе може да го променат нивниот главен пребарувач, но доколку го остават со инсталацијата на Firefox, тој сега ќе биде Google.
Чисто за појаснување. Кога говориме за главен пребарувач, се мисли на пребарувачот којшто ќе се користи при пребарување од лентата за адреси, односно лентата за пребарување која се прикажува со секој нов отворен таб.
Извор: gHacks