На Build 2017 конференцијата, Microsoft се обиде да покаже дека сѐ уште се грижи за смартфон корисниците и тоа не само за нивниот Windows 10 Mobile оперативен систем. Одличен показател за тоа е Graph, што е комбинација на неколку различни можности и апликации која му овозможува на корисникот одлично да го искомбинира користењето на Windows 10 компјутерот со Android и iOS смартфон.
Во позадината на сите овие можности е Cortana, која и досега имаше неколку функционалности, како на пример праќање на SMS порака преку вашиот компјутер. Сепак, овие новитети се многу помоќни. На пример, Timeline е апликација која ќе содржи се што сте правеле на вашиот компјутер или смартфон, независно кога и каде ќе се приклучите.
Поточно, со Timeline ќе имате увид во сите активности на сите уреди и потоа лесно ќе може да продолжите каде сте завршиле, дури и ако е некоја постара активност. За ова ќе помогне Cortana, која дури и ќе ве потсети доколку имате останато некоја работа или активност. Исто како реална „секретарка“.
Слична на Timeline e и Clipboard Cloud апликацијата, која ќе ви овозможи да правите Copy->Paste од вашиот смартфон на вашиот компјутер и обратно. Верувам дека многумина од нас се нашле во ситуација да сакаат да ископираат некој поголем текст од телефонот и да го префрлат на својот компјутер – сега тоа ќе биде исклучително лесно.
На крај, OneDrive клауд просторот ќе биде многу покорисен, бидејќи ќе овозможи да гледате датотеки без да треба да ги симнете на вашиот уред, што е одлична вест за оние со Windows 10 компјутер со помал SSD диск. Тие дури ќе се појавуваат во File Explorer како и секоја друга датотека.
Извор: Engadget, CNET, TechCrunch
