Светскиот натпревар NASA Space Apps Challenge се одржа по 5ти јубилеен пат во Македонија во периодот 28ми-30ти Април, во партнерство со Американска Амбасада во Скопје и телекомуникацискиот оператор Вип, а под Покровителство на Претседателот на Република Македонија Н.Е. Г-дин Ѓорге Иванов.
На настанот во организација на ЊуМенс Бизнис Акцелераторот и Голдилокс Стејт Фондацијата учествуваа млади програмери, инженери, дизајнери, истражувачи, иноватори и претприемачи кои заедно работеа на креирање решенија за проблемите со кои се соочува Земјата. Учесниците за време на настанот добија поддршка и совет од страна на ментори кои се експерти во своите полиња на работа.
Оваа година средношколците доминираа на Nasa Space Apps Challenge. Три тимови од кои два се Judge’s Choice, еден People’s Choice ќе се натпреваруваат за наградата посета на лансирање на ракета и меѓу нив жири комисија и претставници од NASA ќе го изберат победникот.
Тимот SWIFT изработи прототип решение за собирање и обработка на информации од соларни сензори кои би се користеле за предвидување на искористеноста на соларни панели.
Тимот DELTA изработи прототип на уред и платформа за намалување на времето на детектирање на пожари, како и нивно пријавување од случајни минувачи.
Тимот NUMERO UNO одговори креативно на предизвикот на НАСА за изработка на видео во кое што ќе покажеме колку е “КУЛ” планетата земја и ја освои наградата од публика.
Потврда за досегашниот успех и квалитет на решенијата креирани од тимовите во Македонија и на организацискиот тим на ЊуМенс Бизнис Акцелераторот кој стои зад овој натпревар од почетокот, е што оваа година победничкиот тим од Македонија директно патува во Kennedy Space Центарот на NASА каде ќе има можност да проследи полетување на вселенско летало, но и да го презентира своето решение пред претставници на NASA и комерцијалната вселенска индустрија.
Упатуваме огромна благодарност до главните поддржувачи на овој настан кој што помогнаа да го организираме оваа година на ова високо ниво: Претседателот на Република Македонија, Американска Амбасада во Скопје, Вип, ТАВ ИТ, Нетцетера, FX3X, АЕК, ФИНКИ, ФЕИТ, Горска Вода, Везе Шари, Жито Лукс и Red Bull.
