Десеттиот Weekend Media Festival оваа година се одржува од 21 до 24 септември во просториите на старата фабрика за тутун во Ровињ, под покровителство на Adris групата. Во своето прво десетлетие Weekend има примено вкупно 45.000 учесници: 1.000 предавачи, 35.000 медиумски, маркетиншки и ПР професионалци, 3.500 студенти и 5.000 акредитирани новинари од целиот регион. Се има позиционирано како најголемиот комуникациски фестивал во југоисточна Европа, а прв ги има најавено и некои од топ трендовите како што се мобилното огласување, native огласувањето, дигитализацијата, programmatic и blockchain.
По повод овој јубилеј направивме интервју со директорот на фестивалот Томислав Рицов, а неговите одговори можете да ги прочитате во продолжение.
Прво да ви честитаме за успешното организирање на Weekend Media Festival изминатите 9 години. Како би ги сумирале сите овие години, како беше ?
Благодарам. Тоа беше преубав, возбудлив пат. Кога почнувавме не бев сигурен дека ќе доживееме втор роденден, камоли десетти. Среќен сум и горд.
Што ве научи искуството, односно што би сакале порано да сте го знаеле, нешто што сега го знаете ?
Во суштина, многу малку работи имаме сменето од првиот Weekend Media Festival. Како што ги имаме поставено работите на почетокот, така повеќе или помалку се одвиваа работите на сите Weekend-и. Секогаш додаваме нешто ново, но основата е иста.
Какви се реакциите на присутните гости на тоа што до сега можеле да го видат и научат на Weekend-от ?
Одушевени се и од програмата и од атмосферата. Колку приказни и да имаат слушнато за и околу Weekend-от, посетителите се секогаш позитивно изненадени кога ќе дојдат прв пат на фестивалот.
Ќе биде ли овогодинешниот фестивал нешто поразличен поради големиот јубилеј ?
Не многу, а тоа е добра вест. Секоја година ја подигаме скалата погоре, а така ќе биде и овој пат, па ќе има многу среќни посетители.
Какви ви се плановите за идните 10 години ?
Да се менуваме, а да останеме исти. Има многу планови, но ќе видиме што ќе се оствари.
Каква е посетеноста од Македонија?
Добра, со оглед на можностите за доаѓање на посетителите. Ќе работиме повеќе на тоа да на македонците Weekend-от им го направиме уште попривлечен, така да дојдат многу повеќе ваши сограѓани.
