Во денешно време веќе е нормално да читаме вести за купување на некој од големиот број на стартапи од страна на големите компании. Тоа е така поради се полесниот пристап до ресурсите и информациите, па поголемиот дел од способните луѓе се одлучуваат за започнување на сопствена компанија, наместо барање работа во некоја од постојните.
Не ретко, овие нови компании покажуваат дека кај себе имаат одличен и способен кадар, а создаваат и производи кои што се покажуваат како корисни и популарни. Големите компании би можеле да работата на свое решение од одреден таков производ, меѓутоа изгледа е многу поедноставно да се купи целата компанија и да се преземат вработените и готовиот производ.
Најнов ваков пример е купувањето на Digisfera од страна на Google. Оваа компанија е основана пред скоро пет години во Португалија и е специјализирана во технологии за панорамски, односно 360 степени фотографии.
Тие веќе имаат огромен број на слики од целиот свет, а можат да се пофалат и со слики од познатите стадиони и други спортски градби за време на светски првенства или олимписки игри, меѓу другото.
Google ги презема вработените и технологијата од оваа компанија кои што ќе бидат додадени во тимот кој што работи на Street View во Google Maps. Со ова може да се очекува унапредување на „разгледниците“ достапни на овој популарен сервис со уште повеќе слики кои што ќе имаат и подобар квалитет.
Со преминувањето во тимот на Google, некои од сервисите на Digisfera ќе престанат со работа. Конкретно се работи за сервисот за означување на сликите PanoTag.
Информацијата за зделката е објавена на страната на Digisfera и е потврдена од Google, меѓутоа не е позната сумата за која што е купена компанијата.
