Голем дел од приходите Apple ги има остварено со продажбата на музика преку Apple Music или iTunes. Apple Music од 2014-та, кога е за прв пат пуштен сервисот, има инкасирано приход во Apple од неверојатни 2.3 милиони долари. Голем дел од музичките артисти приходите ги остваруваат со рекламирање и продавање на својот креативен материјал преку продавницата за купување на музика на Apple.
Веќе подолго време се шушка дека Apple сака да влезе поенергично во светот на филмот. Сега веќе шушкањето стана гласно зборување.
Според The Wall Street Journal, Apple сака да ни донесе серија налик Game of Thrones, Westworld или пак Stranger Things. Компанијата се советува со продуценти од Netflix и од HBO и планира наскоро да објави неколку телевизиски серии, а можеби и подоцна годинава да направат и неколку долгометражни филмови.
Во iOS 10.2 веќе се појави и нова апликација, едноставно наречена TV со која се претпоставува ќе имате опција за купување и претплата на содржината на продукцијата на Apple. Но, според многумина, опцијата за претплата и купување на содржината ќе биде преку Apple Music.
Шушкањата започнаа уште во 2015-та кога Apple се обиде да ја купи продукциската куќа Time Warner, но преговорите завршија неуспешно.
Но, интересно е што Apple не сака директна конкуренција со HBO или пак со Netflix. Туку сака директна конкуренција со Spotify. Бидејќи основен бизнис на HBO и Netflix е филмската продукција, за Apple би било многу тешко да инвестираат во бизнис со кој би биле конкуренција на овие два гиганти. Целта на Apple е да се истакнат пред Spotify со тоа што ќе понудат нешто поразлично од конкурентскиот сервис.
Секако, ќе биде интересно да видиме што ќе понудат Apple. Можеби ќе гледаме нова серија налик на Friends, за чија реализација и не е потребна голема инвестиција во облик на специјални ефекти. Или пак, ќе се издигнат над шпекулациите и ќе бидеме сведоци на некоја спектакуларна серија со одлични специјални ефекти и познати актери.
Сепак, се надевам дека овој пат Apple ќе понудат нешто поинтересно од автобиографската мини серија за животот на раперот Доктор Дре.
