Откритието доаѓа од познатата компанија од областа на безбедноста Symantec, можеби попозната за обичниот корисник како производител на Norton Anti Virus и сличен безбедносен софтвер. Малициозниот софтвер е наречен Regin и според извештајот се верува дека е пуштен во јавноста уште од 2008 година. Неговиот модуларен начин на работа го прави многу тежок за откривање, а од компанијата истакнуваат дека ги немаат сите потребни податоци и примероци за да можат целосно да го проучат софтверот и понудат соодветна заштита.
За Regin се верува дека се користи за шпионирање на повеќе категории на компании, како и индивидуални корисници, но и владини организации и слично. Неговото потекло уште не може да се утврди, а се верува дека има големи шанси да е развиен од страна на некоја државна институција. Развојот на Regin се верува дека траел со месеци, а можеби и години и содржи способност за сокривање на трагите на компјутерот на кој што има успешно влезено. Нивото на ресурси, како и способноста на овој софтвер е една од причините поради кои што од Symantec веруваат дека за неговиот развој стои некоја владина агенција.
Она што го прави овој софтвер прилично уникатен, односно редок и тежок за откривање е неговиот модуларен начин на работа, односно работа во повеќе фази по влегување во компјутерот. Сите овие фази се енкриптирани и направени за извршување на одредена задача на компјутерот. Ова е исклучок само за првата фаза, односно фазата на влегување во компјутерот преку некоја слабост во системот во форма на Trojan или Backdoor. Наредните фази се направени така да секоја ја активира наредната, по што софтверот му овозможува на неговиот корисник да избере од повеќе можности како што е следење на комуникацијата, контрола на компјутерот и слично.
Повеќето заразени компјутери се наоѓаат во Русија и Саудиска Арабија, но има и компјутери од европските земји, Индија, Иран и други.