Feedly е сервис за агрегирање на вести достапен преку апликации за Android и iOS уредите, како и преку веб. Тој е можеби најпознатиот и најмногу користен сервис кој што ја доби популарноста по прекинување на Reader од страна на Google. Google Reader беше сервис преку кој што корисниците можеа да ги следат RSS листите од своите омилени веб страни преку еден централизиран сервис.
Денеска од компанијата преку својата страна изјавија дека на нив се извршува DDoS напад, односно Distributed Denial of Service од страна на непознати напаѓачи кои што бараат од компанијата пари за да го престанат нападот. Како што изјавуваат од Feedly тие не планираат да платат и се во контакт со нивниот провајдер, како и со други компании кои што биле цел на вакви напади и со полициските власти. Информациите и податоците на корисниците се сигурни, изјавуваат од компанијата, а сервисот ќе биде вратен во работа во најкраток можен рок.
Овој тип на напади на сервисите најчесто се извршува преку праќање на огромен број на барања до серверот, со што се симулира голем број на корисници, поради што серверот не може да продолжи да работи или работи многу бавно. Овој тип на напади обично е многу тешко да се спречат и кога ќе се случат потребно е време за прекинување на истите.