Мини компјутерите на кои дивелоперите можат да ги вежбаат своите програмерски способности, но и кои можат да се користат за многу “Internet of Things” апликации, стануваат се попопуларни, а тоа особено важи за пионерот Raspberry Pi. Сепак, тој сега има се посилна конкуренција, а најнов таков компјутер е помоќниот Asus TinkerBoard.
Ова „моќен“ е само релативно – TinkerBoard и натаму е мини компјутер и не е наменет за сериозна работа. Сепак, споредено со неговиот главен конкурент Raspberry Pi 3, тој има доста помоќни компоненти. Чипот вграден во него е Rockchip RK3288 со четири ARM Cortex-A17 јадра, додека графиката е Mali T764.
Двете компоненти се доволно моќни за испорачување 4K резолуција и репродукција на 4K видео, што го прави овој компјутер одличен за поврзување со новите Ultra HD телевизори. Asus TinkerBoard има и 2 GB рам меморија, Gigabit Ethernet конекција, SDIO 3.0 интерфејс за брз трансфер на податоци на micro SD картичка (мора да се набави за да се инсталира оперативен систем на неа), солидно HD аудио од 24-bit/192 kHz за мултимедијалните потреби, HDMI 2.0 излез и променлива антена за Wi-Fi чипот кој ги поддржува сите мрежи – 802.11 b/g/n.
Од сите информации за новиот Asus TinkerBoard не е објавена само цената, но очекувано е да биде околу 70 долари, што е очекувано повеќе од Raspberry Pi 3.
Извор: Geeky Gadgets, Tech Report, Hackaday
