Дури и најголемите вљубеници и поддржувачи на Windows Phone почнаа да се сложуваат – платформата каква што ја знаевме досега е „мртва“. Ова не значи дека нема да има смартфони со Windows 10 Mobile, но нивниот број засега ќе биде исклучително мал и тие ќе бидат наменети за специјална група на купувачи.
Сепак, според нова изјава на извршниот директор на Microsoft, Сатја Надела, тие подготвуваат нова иницијатива на пазарот на мобилните уреди. Тоа нема да биде со смартфон кој ќе личи на останатите Android и iOS уреди на пазарот и кој ќе ги има истите можности. Ако научивме нешто досега за Surface одделот на Microsoft, тоа е дека сите уреди кои ги имаат дизајнирано досега се спој на повеќе различни уреди во еден.
Токму таква беше и најавата на Сатја Надела, кој најави дека Microsoft ќе продолжи да се натпреварува во пазарот на телефони, но не со уреди какви што се дефинирани од предводниците на пазарот. Според него, тие ќе направат уникатен телефон кој ќе биде „ултимативниот мобилен уред“.
Ние засега можеме само да нагаѓаме што сето ова може да значи за Surface Phone и какви можности би можел да има. Има најави дека Windows 10 Mobile наскоро ќе поддржува емулација на x86 софтвер, односно на стандардни Windows програми, што би можела да биде уникатна можност, но според мене Surface Phone ќе биде многу повеќе од тоа.
Всушност, неодамна Microsoft најави дека тие повеќе ќе се фокусираат на Mobile делот на Windows 10 во 2017 година, кога може да очекуваме нови подобрувања и функционалности од овој оперативен систем на Microsoft. Сигурен сум дека многу од нив ќе содржат поддршка за виртуелна и изменета реалност, како и апликации за цртање со 3D објекти, како на пример новата Paint 3D.
Со овие промени Windows 10 Mobile би можел да биде уникатно позициониран на пазарот како систем кој ќе им овозможи на корисниците да прават многу повеќе со својот телефон, нешто што верувам ќе биде збогатено со уникатните хардверски можности на Surface Phone, кој би можел конечно да ја освежи смартфон сцената.
Извор: The Next Web, MS Power User, Trusted Reviews
