Кога Google ги претстави своите Pixel 2 паметни телефони, не спомна еден многу важен факт, кој според сите кои веќе ги тестираа смартфоните, им овозможува да извадат многу подобри фотографии од конкурентите. Се работи за првиот чип развиен од Google, кој е специјално наменет за обработка на фотографиите и кој се вика Pixel Visual Core.
Овој чип има неколку уникатни карактеристики, кои му овозможуваат побрзо и подобри да ги обработи фотографиите. Многу добар пример за тоа е HDR+ опцијата, односно можноста смартфонот секогаш да фотографира повеќе фотографии и од нив да извади една со поширок динамички опсег. Ова функционира и за фотографиите во темница, кога се зема информација од повеќе фотографии за да се исчисти шумот.
Засега, Pixel 2 и Pixel 2 XL смартфоните не го користат овој чип, односно го користат специјалниот чип за фотографирање вграден во Snapdragon 835 процесорот, кој има слични можности. Причината за ова е што софтверот сѐ уште не е спремен и најверојатно, Google ќе го активира Pixel Visual Core со некоја софтверска надградба во иднина. Ова би можело да донесе уште побрзо и поефикасно фотографирање на HDR+ и ноќни фотографии.
Pixel Visual Core сепак не застанува тука – од Google најавуваат дека овој чип ќе биде отворен и за дивелоперите, кои би можеле да го вградат во своите камера апликации. Првите плодови од вградувањето на овој фотографски чип би можеле да ги видиме уште со Android Oreo 8.1 надградбата, која треба да пристигне наскоро.
Извор: The Verge, The Next Web, BGR
